Գիրք՝ Newmag-ի հրատարակության: Կազմը՝ կոշտ, 264 էջ: Վեպի հերոսը հին հունական դիցաբանական հերոսի՝ Մինոտավրոսի պես խճճվում է իր ընտանիքի պատմությունների լաբիրինթոսում։ Այդ պատմության թելն անցնում է ոլորապտույտ միջանցքներով, մտնում անհամար սենյակներ, որոնցում միախառնվում են անցյալն ու ներկան, առասպելն ու փաստագրված իրականությունը։ Թռչելով ժամանակաշրջանից ժամանակաշրջան, համադրելով ու հակադրելով իրարամերժ տեսակետներ՝ հեղինակը բացահայտում է արեւելաեվրոպացիների մտածելակերպը, 2-րդ աշխարհամարտի հետեւանքներն ու Բուլղարիայի կոմունիստական բյուրոկրատիայի դեմքը։ Անհավանական հուզիչ կամ անսովոր զվարճալի այս վեպը նոր տեսակի ընթերցանության փորձ է պարգեւում։ Ընթերցողը հետեւում է արտասովոր պատումներին, ցատկում ժամանակաշրջաններով, խճողվում հերոսների ճակատագրերի մեջ եւ խճճվում ճիշտ այնպես, ինչպես վեպի գլխավոր խորհրդանիշը՝ Մինոտավրոսը՝ կյանքի ու հանգամանքների լաբիրինթոսում։ Այս վեպը կարեկցանքի եւ դրա անհետացման, մարդու մեջ փակված տխուր հրեշի մասին է։
Գեորգի Գոսպոդինովը (ծնվ․ 1968 թ․) բուլղարացի գրող է, բանաստեղծ, գրականագետ և գրաքննադատ։ Ավարտել է Սոֆիայի համալսարանի բուլղարական բանասիրության ֆակուլտետը։ 1993-ից գրական խմբագիր է Литературен вестник թերթում։ Օքսֆորդի Orient Express գրական ամսագրի բուլղարական բաժնի խմբագիրն է։ Բուլղարիայի ԳԱ դոկտորանտ է։ Հայտնի է դարձել 1992-ին, երբ լույս է տեսել նրա բանաստեղծությունների 1-ին ժողովածուն։ 2000-ին լույս տեսած առաջին արձակ գործը՝ «Естествен роман»-ը, ԽՍՀՄ փլուզումից հետո ամենից շատ (22 լեզվով) թարգմանված բուլղարական վեպն է։ 2011-ին լույս է տեսել Գոսպոդինովի 2-րդ վեպը՝ «Տրտմության ֆիզիկան», որն արժանացել է Բուլղարիայի բոլոր գրական մրցանակներին և թարգմանվել ավելի քան 8 լեզուներով։