Այս պատմության գործողությունները տեղի են ունենում իրական քաղաքի երևակայական կողմում, երևակայական ու ինտերակտիվ ժամանակայնությամբ։ Այստեղ ոչինչ իրական չէ, և ամեն ինչն է իրական։ Չէ՞ որ քաղաքի գույները տարբեր են բոլորի համար։ Մթին քաղաքում տեղի են ունենում մթին իրադարձություններ, որոնք փաստի առաջ են կանգնեցնում հերոսներին։ Վերջիններիս առերեսումն անցյալի հետ խոստանում է նոստալգիկ լինել։ Նրանցից ոմանք հստակ գիտեն՝ ինչպես պետք է վարվեն, իսկ մյուսները բոլորովին չեն պատկերացնում իրենց հետագա քայլերը։ Եվ այս քաոսի մեջ մի բան է միայն հաստատ դառնում՝ ընտրություն։ Գիրքը վերադարձի ու դրա անհնարինության մասին է։ Ընտրություն հնարավորի ու անհնարինի միջև։ Ընտրություն, որ վերջինն է լինելու, առանց հետդարձի որևէ ճանապարհի։ Երիտասարդ զույգի կյանքը, քիչ թե շատ, հաջողված է ու սիրով լցված։ Բայց կյանքն անկանխատեսելի է ու չի սիրում նրանց, ովքեր համաձայն չեն դրա հետ․․․ Իսկ ի՞նչ կլինի եթե մի օր ամենաանցանկալի պատահականությունը, այնուամենայնիվ, իրականություն դառնա։ Պատրաստվեք գլխավոր հերոսների հետ ամենագլխապտույտ ճամփորդությանը՝ երկու տարբեր անցյալների ու ներկայի միջև։ Եվ երազե՛ք ապագայի մասին, որն այդպես էլ չի գալու։ Երազեք նրանց փոխարեն, որովհետև նրանք դա չարեցին․․․ Ժանրը` թրիլլեր, սիրավեպ, հոգեբանական դրամա, ֆենթըզի, վեպ-մյուզիքլ