Նկարիչ Գևորգ Բրուտյանի ստեղծած հայկական տարազի պատկերազարդ ալբոմը (1942–1952 թթ.) իր տեսակի մեջ առաջին աշխատությունն է, որը, սակայն հայ ընթերցողին հասանելի դարձավ միայն 2022 թվականին՝ «Էդիթ Պրինտ» հրատարակչության շնորհիվ։ 

Ալբոմում ներկայացված են Տիգրան Մեծի ժամանակներից մինչև 20-րդ դարի կեսերը գործածված հայկական տարազները՝ ըստ տարբեր գավառների և խավերի։

Ալբոմն ստեղծելիս Գ. Բրուտյանն օգտվել է հնագիտական, մանրանկարչական, պատմագրական և այլ գիտական աղբյուրներից, քանդակապատկերներից, թանգարանային նմուշներից ու գեղանկարչական ստեղծագործություններից։ 

Ժողովածուի առաջին բաժնում ընդգրկված են պատմական տարազները` ժամանակագրական կարգով, երկրորդ բաժնում զետեղված են ազգագրական բնույթի տարազները, իսկ երրորդ բաժնում տեղ են գտել տարբեր երկրներում բարձր դիրքի հասած հայ պետական, ռազմական գործիչների, պաշտոնյաների, վաճառականների հագուստները, ինչպես նաև բարձրաստիճան հոգևորականների ծիսական հանդերձանքը։